وزیراعظم دہشتگردی کے خلاف تمام سیاسی جماعتوں کے ساتھ بات کیلئے تیار ہیں: رانا ثنا

وزیراعظم کے مشیر برائے سیاسی امور سینیٹر رانا ثنا اللہ نے سینیٹ اجلاس میں اظہارِ خیال کرتے ہوئے تمام سیاسی جماعتوں کو دعوت دی ہے کہ وہ ملک میں امن و امان کی بحالی اور دہشت گردی کے خاتمے کے لیے وزیراعظم کے ساتھ مذاکراتی میز پر بیٹھیں۔ انہوں نے ایوان کو بتایا کہ خیبرپختونخوا کی صوبائی حکومت کی جانب سے انسدادِ دہشت گردی کے معاملے پر تعاون نہیں مل رہا جبکہ بلوچستان حکومت کا مکمل تعاون حاصل ہے۔ سینیٹر رانا ثنا اللہ نے قومی اسمبلی کے اپوزیشن لیڈر محمود خان اچکزئی سے ضد چھوڑ کر گفتگو کا راستہ اپنانے کی اپیل کی اور افسوس ظاہر کیا کہ اپوزیشن کے نمائندے نیشنل ایپکس کمیٹی کے اہم اجلاسوں میں شریک نہیں ہوتے۔ بانی پی ٹی آئی سے جیل ملاقاتوں کا ذکر کرتے ہوئے ان کا کہنا تھا کہ اداروں کے خلاف بیانیہ بنانے کے باعث قوانین کے تحت ملاقاتوں کے ضوابط سخت کیے جائیں گے۔