امریکی حکام کا مقبوضہ مغربی کنارے کے مسیحی فلسطینی گاؤں طیبہ کا دورہ

امریکی حکومت کے اعلیٰ حکام نے مقبوضہ مغربی کنارے میں واقع تاریخی مسیحی فلسطینی گاؤں الـطیبہ کا ہنگامی دورہ کیا ہے، جو دو روز قبل اسرائیلی آبادکاروں کی جانب سے غیر قانونی تشدد اور سفارت کاروں پر حملے کا نشانہ بنا تھا۔

رپورٹس کے مطابق امریکی نائب معاون وزیرِ خارجہ برائے جمہوریت، انسانی حقوق و محنت رائلی بارنز اور دیگر بیرونی سفارت کاروں نے طیبہ گاؤں کے مقامی چرچ کا دورہ کیا اور وہاں کی مسیحی برادری سے ملاقات کر کے ان کے ساتھ اظہارِ یکجہتی کیا۔ واضح رہے کہ اس سے قبل نقاب پوش انتہا پسند اسرائیلی آبادکاروں نے بیلجیئم، فرانس اور پولینڈ کے سفارت کاروں، ایک فرانسیسی میئر اور مقامی فلسطینی شہریوں کو وحشیانہ تشدد کا نشانہ بنایا تھا۔

یاد رہے کہ اس واقعے سے ایک روز قبل زیتون کی فصل کی کٹائی کی کوریج کرنے والے ایک امریکی فوٹو جرنلسٹ ہیڈی لیون کو بھی اسرائیلی آبادکاروں نے زیتون کے باغات میں گھیر کر تشدد کا نشانہ بنایا تھا، جس پر عالمی سطح پر شدید تشویش کا اظہار کیا گیا تھا۔