آسٹریلین ایئر لائنز کی پرواز میں بم کی اطلاع، طیارے کی بلغاریہ میں ہنگامی لینڈنگ

آسٹرین ایئر لائنز کی تل ابیب (اسرائیل) سے ویانا (آسٹریا) جانے والی پرواز میں بم کی اطلاع کے بعد طیارے نے بلغاریہ کے صوفیہ ایئرپورٹ پر ہنگامی لینڈنگ (Emergency Landing) کی ہے۔

رپورٹس کے مطابق طیارے میں اقوامِ متحدہ کے ایک اجلاس میں تقریر کے لیے جانے والا نوجوانوں کا خصوصی وفد بھی سوار تھا۔ پرواز کے دوران جہاز کے عملے کو اندر بم یا کسی مشکوک شے کی موجودگی کے حوالے سے غیر تصدیق شدہ اطلاع موصول ہوئی، جس پر فوری طور پر ایمرجنسی کوڈ جاری کر دیا گیا۔ طیارہ بلغاریہ کی سرحد کے قریب 36 ہزار فٹ کی بلندی پر پرواز کر رہا تھا جب پائلٹ نے ہنگامی طور پر رخ موڑ کر صوفیہ ایئرپورٹ پر جہاز کو اتارا۔

ہنگامی لینڈنگ کے فوراً بعد بلغاریہ کی سیکیورٹی فورسز نے طیارے کو گھیرے میں لے لیا۔ عالمی حفاظتی پروٹوکول کے تحت تمام مسافروں، عملے اور سامان کی باریک بینی سے مکمل تلاشی لی گئی، تاہم سیکیورٹی کلیئرنس کے دوران کسی قسم کے دھماکہ خیز مواد یا مشکوک شے کی تصدیق نہیں ہوئی جس کے بعد مسافروں نے سکون کا سانس لیا۔