کینیڈا میں بھارت مخالف نعروں کی گونج، بھارتی پنجاب کو آزاد ریاست بنانے کا مطالبہ

کینیڈا کے شہر ایڈمنٹن میں خالصتان ریفرنڈم کے لیے پولنگ کا انعقاد کیا گیا، جہاں بھارت مخالف نعروں کی گونج سنائی دی اور بھارت سے علیحدگی اختیار کرتے ہوئے بھارتی پنجاب کو ایک آزاد ریاست بنانے کا پرزور مطالبہ کیا گیا۔

البرٹا صوبائی اسمبلی کے باہر منعقدہ اس پولنگ میں حصہ لینے کے لیے امریکا اور کینیڈا بھر سے ہزاروں کی تعداد میں سکھ کمیونٹی کے افراد ایڈمنٹن پہنچے، جس کے باعث پولنگ مرکز کے باہر ووٹرز کی طویل قطاریں لگ گئیں۔ خالصتان ریفرنڈم کے اس مرحلے میں سکھ برادری نے انتہائی جوش و خروش سے بڑی تعداد میں شرکت کی۔

پولنگ کے دوران مرکز کے باہر شرکاء نے بھارتی حکومت اور ریاستی جارحیت کے خلاف شدید نعرے بازی کی۔ سکھ رہنماؤں کا کہنا تھا کہ پرامن طریقے سے رائے شماری کا یہ عمل عالمی سطح پر ان کے حقِ خودارادیت کی آواز بلند کرنے کا اہم ذریعہ ہے۔ ایڈمنٹن میں ہونے والی یہ پولنگ شام پانچ بجے تک بلا تعطل جاری رہی۔