ہنزہ کے بالائی علاقوں میں بارش اور پہاڑوں پر برفباری، موسم سرد ہو گیا

گلگت کے شمال میں واقع عالمی شہرت یافتہ وادیِ ہنزہ کے بالائی علاقوں میں بارش اور پہاڑوں پر برف باری کا نیا سلسلہ شروع ہو گیا ہے، جس سے خطے میں سردی کی لہر میں شدید اضافہ ہو گیا ہے۔

محکمہ موسمیات کے مطابق وادیِ ہنزہ اور گرد و نواح کے بلند و بالا پہاڑوں پر مسلسل برف باری کا سلسلہ جاری ہے، جس کے باعث تمام پہاڑی سلسلے برف کی سفید چادر سے ڈھک گئے ہیں۔ برف باری کے اس تازہ اسپیل سے وادی کے قدرتی مناظر مزید حسین اور دلکش ہو گئے ہیں اور سیاحتی پوائنٹس پر خوبصورت مناظر دیکھنے کو مل رہے ہیں۔

دوسری جانب ہنزہ میں موجود مقامی افراد اور سیاح بارش اور برف باری کے باعث بڑھتی ہوئی ٹھنڈ سے لطف اندوز ہو رہے ہیں۔ علاقے میں آنے والے سیاحوں کا کہنا ہے کہ برف سے ڈھکے ہوئے پہاڑ اور وادی کا جادوئی ماحول ان کی توجہ کا مرکز بنا ہوا ہے۔ تاہم، مقامی انتظامیہ نے بالائی علاقوں کا سفر کرنے والے سیاحوں کو سرد موسم کے پیش نظر ضروری احتیاطی تدابیر اختیار کرنے کی ہدایت کی ہے۔