پنجاب میں ایک سال کے دوران 4 لاکھ مویشی تیار، لائیوسٹاک برآمدات میں 43 فیصد اضافہ

وزیراعلیٰ پنجاب آفس کی جانب سے جاری کردہ بریفنگ و اعلامیے کے مطابق صوبے میں لائیوسٹاک (مویشی پالنے) کے شعبے میں گزرا سال انتہائی کامیاب رہا، جس کے دوران صوبے بھر میں 4 لاکھ مویشی تیار کیے گئے اور دیہی فارمرز نے اربوں روپے کا معاشی منافع حاصل کیا۔

اعلامیے کے مطابق حکومت کے ‘لائیوسٹاک کارڈ’ اقدام سے ہر فارمر کو فی مویشی 27 ہزار روپے کا منافع حاصل ہوا۔ اس پروگرام کی بدولت پنجاب میں دیہی خواتین فارمرز کی فعال شرکت میں نمایاں اضافہ دیکھا گیا، جس سے ان کی تعداد 90 سے بڑھ کر 1,107 ہو گئی ہے۔ صوبے سے مویشیوں اور گوشت کی عالمی برآمدات (Export) میں 43 فیصد کا بڑا اضافہ ریکارڈ کیا گیا، جس میں لائیوسٹاک کارڈ کے تحت 1 لاکھ 29 ہزار سے زائد مویشی برآمد کیے گئے۔ برآمدات میں ملتان سے 27 ہزار، بہاولپور سے 24,297، سرگودھا سے 22 ہزار، لاہور سے 20 ہزار اور فیصل آباد سے 12,529 مویشی شامل تھے۔

حکومتی اعلامیے میں بتایا گیا کہ پنجاب سے چین، یورپ اور امریکہ جیسی بڑی عالمی منڈیوں کو لائیوسٹاک برآمد کرنے کی راہ ہموار کی جا رہی ہے۔ اس سلسلے میں منہ کھُر کی بیماری سے پاک (Foot and Mouth Disease – FMD) 8 کمپارٹمنٹس نوٹیفائی کیے جا چکے ہیں جبکہ 7 مزید رواں سال قائم ہوں گے۔ مزید برآں، پبلک پرائیویٹ پارٹنرشپ کے تحت 28 ارب روپے کی نجی سرمایہ کاری سے پہلی بار ایف ایم ڈی ویکسین کی مقامی تیاری کا یونٹ قائم کیا جا رہا ہے۔

صوبائی حکومت لائیوسٹاک سیکٹر میں ویلیو ایڈیشن کے لیے 19 ارب روپے کی فنانسنگ سبسڈی فراہم کرے گی، جبکہ میٹ ویلیو چین (Meat Value Chain) کے تحت 65 ارب روپے کی نجی سرمایہ کاری متوقع ہے۔ اس کے علاوہ صوبے میں 5 جدید میٹ پراسیسنگ پلانٹس، 5 ماڈرن سلاٹر ہاؤسز، میٹ پیکنگ ہاؤسز اور کمرشل فیڈ لاٹس قائم کیے جا رہے ہیں۔ ‘لائیوسٹاک کنیکٹ سسٹم’ کے ذریعے 1,725 فیٹننگ فارمز، 20 برآمدی مذبح خانوں اور 88 میٹ ایکسپورٹرز کو براہِ راست باہم منسلک کر دیا گیا ہے۔