‘ہر شہری سے قربانی کی توقع کی جائے گی’، برطانوی فوج کے سربراہ نے جنگ کے خطرات کے حوالے سے انتباہ جاری کر دیا

برطانوی فوج کے سربراہ جنرل سر رولی واکر (General Sir Roly Walker) نے عالمی سطح پر ابھرتے ہوئے جنگ کے خطرناک حالات اور دفاعی چیلنجز پر برطانیہ کو خبردار کرتے ہوئے بڑا انتباہ جاری کیا ہے۔

شمالی یارکشائر (North Yorkshire) میں برطانوی فوجیوں سے خطاب کرتے ہوئے جنرل سر رولی واکر نے کہا کہ برطانیہ کی سیاسی قیادت کو عوام کے ساتھ کھل کر بات چیت کرنی چاہیے اور انہیں ممکنہ جنگ کے لیے ذہنی اور عملی طور پر تیار کرنا چاہیے۔ ان کا کہنا تھا کہ ملک کو درپیش خطرات کے پیشِ نظر ہر شہری سے قربانی دینے اور مملکت کے دفاع میں اپنا فعال کردار ادا کرنے کی توقع کی جائے گی۔

برطانوی آرمی چیف نے فوجیوں سے مخاطب ہوتے ہوئے کہا کہ قوم کو آنے والے وقت میں ان کی سخت ضرورت پڑنے والی ہے، اور سیاسی قیادت پر لازم ہے کہ وہ قوم کو دفاعی اور سلامتی کے مقاصد کے لیے تیار کرے۔ میڈیا رپورٹس کے مطابق برطانوی وزیراعظم بھی جلد ایک نئی عوامی آگاہی مہم شروع کرنے کا ارادہ رکھتے ہیں، جس کا مقصد شہریوں کو جنگوں، بحرانوں، سیلاب اور خشک سالی جیسی ہنگامی صورتِ حال سے نمٹنے کے لیے تیار رکھنا ہے۔ واضح رہے کہ حال ہی میں سامنے آنے والے ایک عوامی سروے میں 48 فیصد برطانوی شہریوں نے کہا تھا کہ وہ کسی بھی ممکنہ جنگ میں حصہ لینے یا دفاعی خدمات کے حامی نہیں ہیں۔