مقبوضہ مغربی کنارے میں اسرائیلی قابضین کا فلسطینیوں اور امریکی صحافی پر حملہ

مقبوضہ مغربی کنارے کے گاؤں ابو فلاح (Abu Falah) میں اسرائیلی غاصب آبادکاروں کے ایک جتھے نے فلسطینی کسانوں اور کوریج کے لیے موجود ایک سینئر امریکی خاتون صحافی پر حملہ کر کے شدید تشدد کا نشانہ بنایا ہے۔

عینی شاہدین اور بین الاقوامی میڈیا رپورٹس کے مطابق، تقریباً 80 نقاب پوش اسرائیلی آبادکاروں نے زیتون کی کٹائی میں مصروف نہتے فلسطینی کسانوں پر اچانک دھاوا بول دیا۔ اس موقع پر کوریج میں مصروف 63 سالہ امریکی فوٹو جرنلسٹ ہیڈی لیوائن (Heidi Levine) کو بھی شدید تشدد کا نشانہ بنایا گیا۔ صحافی نے بتایا کہ حملہ آوروں نے زیتون کے باغات کو آگ لگا دی، پتھراؤ کیا اور انہیں زمین پر گرا کر لاٹھیوں اور لاتوں سے مارا۔

حملہ آوروں نے امریکی صحافی کا کیمرہ اور دیگر پروفیشنل سامان بھی چھین لیا۔ شدید تشدد کے باعث ہیڈی لیوائن کو فریکچر اور جسم پر متعدد شدید چوٹیں آئیں، جس کے بعد انہیں فوری طور پر تشویشناک حالت میں ہسپتال منتقل کیا گیا۔ اس پرتشدد واقعے میں متعدد فلسطینی کسان بھی شدید زخمی ہوئے، جبکہ کارروائی کے دوران اسرائیلی فوج نے ایک فلسطینی شہری کو گولی مار کر زخمی کر دیا۔