سعودیہ کو حوثیوں کیخلاف اسرائیلی مدد کی پیشکش قبول کرنی چاہئے: صدر ٹرمپ کا مشورہ

امریکی صدر ڈونلڈ ٹرمپ نے سعودی عرب پر زور دیا ہے کہ وہ یمن کے حوثی باغیوں کے خلاف لڑائی اور دفاعی شعبے میں اسرائیل کی جانب سے کی جانے والی مدد کی پیشکش کو قبول کر لے۔

وائٹ ہاؤس میں صحافیوں سے گفتگو کرتے ہوئے جب امریکی صدر سے سوال کیا گیا کہ کیا سعودی عرب کو اسرائیل کی یہ پیشکش ماننی چاہیے، تو انہوں نے جواب دیا، “ہاں بالکل، میرا خیال ہے کہ سعودی عرب کو یہ پیشکش قبول کر لینی چاہیے۔ اسرائیل سعودی عرب کے لیے ایک اہم اور مفید اتحادی ثابت ہوا ہے اور وہ بہت مددگار ہو سکتا ہے۔”

صحافیوں سے بات چیت کے دوران امریکی صدر نے ایران سے متعلق گفتگو کرتے ہوئے کہا کہ وہ تہران کی تمام تر سرگرمیوں اور بیانات سے مکمل آگاہ ہیں۔ ان کا کہنا تھا کہ ایران میں اب کوئی ایسا بااثر رہنما باقی نہیں بچا جس سے مذاکرات کیے جا سکیں۔ اس کے علاوہ، ٹرمپ نے واضح کیا کہ یوکرین کی سٹارلنک یا سٹار شیلڈ نظام تک رسائی محدود کرنے میں ان کا یا ایلون مسک کا کوئی ہاتھ نہیں تھا۔ انہوں نے یہ دعویٰ بھی کیا کہ وہ اور روسی صدر ولادیمیر پیوٹن یوکرین جنگ کا خاتمہ چاہتے ہیں اور جلد روس و چین کے ساتھ ایک اہم جوہری معاہدہ طے پائے گا۔