پاکستان کا اسرائیلی قبضہ ختم کرنے، آزاد فلسطین کیلئے ناقابلِ تنسیخ مدت مقرر کرنے کا مطالبہ

پاکستان نے غزہ کی ابتر اور تشویشناک صورتِ حال پر گہری تشویش کا اظہار کرتے ہوئے خطے میں اسرائیلی قبضے کے مستقل خاتمے اور ایک آزاد فلسطینی ریاست کے قیام کا پرزور مطالبہ کیا ہے۔

اقوام متحدہ میں پاکستان کے قائم مقام مستقل مندوب سفیر عثمان جدون نے سلامتی کونسل کے اجلاس سے خطاب کرتے ہوئے کہا کہ جب تک فلسطینی عوام پر غاصبانہ قبضہ جاری رہے گا اور انہیں ان کا حقِ خودارادیت نہیں ملتا، مشرقِ وسطیٰ میں پائیدار اور دائمی امن کا قیام ہرگز ممکن نہیں۔ انہوں نے اس عزم کا اعادہ کیا کہ پاکستان ہر مشکل وقت میں مظلوم فلسطینی بھائیوں کے شانہ بشانہ کھڑا ہے۔

پاکستانی مندوب نے زور دیا کہ عالمی برادری کو ایک ایسی حتمی اور ناقابلِ تنسیخ مدت (Timeline) کا تعین کرنا چاہیے جس کے تحت 1967 سے قبل کی سرحدوں کی بنیاد پر ایک آزاد، خودمختار اور قابلِ عمل فلسطینی ریاست قائم کی جائے، جس کا دارالحکومت مشرقی بیت المقدس (East Jerusalem) ہو۔ انہوں نے مقبوضہ مغربی کنارے میں صیہونی بستیوں کی توسیع، مکانات کی مسماری، جبری بے دخلی اور مسجدِ اقصیٰ کے تقدس پامال کرنے کے واقعات کی شدید مذمت کرتے ہوئے مطالبہ کیا کہ سلامتی کونسل کی قراردادوں کے مطابق یہودی بستیوں کی تمام سرگرمیاں فوری طور پر بند کی جائیں۔

عثمان جدون نے غزہ میں فوری جنگ بندی، انسانی امداد کی بلا رکاوٹ فراہمی اور UNRW کی خدمات کی مکمل حمایت پر زور دیا۔ انہوں نے خبردار کیا کہ اسرائیل کی جانب سے زمینی حقائق کو تبدیل کرنے کی دانستہ کوششیں امن کی تمام امیدوں کو ختم کر رہی ہیں۔ اس کے ساتھ ساتھ، پاکستانی مندوب نے سعودی عرب کے شہری و اقتصادی ڈھانچے پر حوثی حملوں کی شدید مذمت کرتے ہوئے سعودی سلامتی اور خودمختاری کے ساتھ غیر متزلزل یکجہتی کا اظہار کیا اور یمن میں اقوام متحدہ کے تحت پرامن مذاکرات کی بحالی کی حمایت کی۔