آسٹریلیا میں چھوٹا طیارہ گر کر تباہ، دو افراد ہلاک

آسٹریلیا کی ریاست نیو ساؤتھ ویلز (New South Wales) میں ایک چھوٹا طیارہ حادثے کا شکار ہو کر تباہ ہو گیا، جس کے نتیجے میں طیارے میں سوار دو افراد ہلاک ہو گئے ہیں۔

عالمی میڈیا اور آسٹریلوی ریاستی پولیس کی رپورٹ کے مطابق یہ حادثہ جمعہ کی دوپہر مقامی وقت کے مطابق 1:55 بجے سڈنی سے تقریباً 200 کلومیٹر شمال مغرب میں واقع قصبے سکون (Scone) کے ایک چھوٹے ایئرپورٹ کے قریب پیش آیا۔ طیارہ زمین سے ٹکراتے ہی تباہ ہو گیا اور اس میں موجود دو افراد موقع پر ہی دم توڑ گئے۔ پولیس کی جانب سے فی الحال ہلاک ہونے والوں کی شناخت عام نہیں کی گئی ہے۔

واقعے کے فوراً بعد پولیس نے جائے حادثہ کو سیل کر کے ابتدائی تحقیقات کا آغاز کر دیا ہے، جبکہ واقعے کی تکنیکی وجوہات کا پتہ لگانے کے لیے آسٹریلوی ٹرانسپورٹ سیفٹی بیورو (ATSB) اور ریکریشنل ایوی ایشن آسٹریلیا کو بھی باضابطہ طور پر مطلع کر دیا گیا ہے۔ سیفٹی بیورو کے مطابق حادثے سے متعلق تمام ضروری شواہد اور معلومات جمع کی جا رہی ہیں تاکہ شواہد کی روشنی میں رپورٹ تیار کی جا سکے۔