یورپی یونین کے سیٹلائٹ منصوبے کے منظوری کیلئے شراکت داروں کیساتھ مذاکرات

یورپی یونین (EU) امریکی ارب پتی ایلون مسک کی خلائی و سیٹلائٹ کمپنی سپیس ایکس (SpaceX) پر اپنا انحصار ختم اور کم کرنے کے لیے اپنے مشترکہ سیٹلائٹ منصوبے کو حتمی شکل دینے کی جانب تیزی سے پیش رفت کر رہی ہے۔ اس سلسلے میں مسابقتی قوانین کے تحت جلد منظوری کے حصول کے لیے اپنے شراکت دار اداروں لیونارڈو ایس پی اے (Leonardo SpA)، ایئربس ایس ای (Airbus SE) اور تھیلز ایس اے (Thales SA) کے ساتھ اہم مذاکرات جاری ہیں۔

عالمی میڈیا رپورٹ اور امریکی نشریاتی ادارے بلومبرگ کے مطابق، اس تزویراتی منصوبے کو “پراجیکٹ برومو” (Project Bromo) کا نام دیا گیا ہے، جسے یورپی کمیشن کی صدر ارسلا وان ڈیر لیین (Ursula von der Leyen) نے یورپ کا ممکنہ “یورپی چیمپئن” قرار دیا ہے۔ اس منصوبے کا بنیادی مقصد ایک ایسا مضبوط یورپی ادارہ قائم کرنا ہے جو یورپ کو خلائی و مواصلاتی نظام میں سپیس ایکس سمیت دیگر امریکی سیٹلائٹ پرووائیڈرز کے اثر و رسوخ سے آزاد کر سکے۔

ذرائع کے مطابق گزشتہ ایک سال سے جاری ان مذاکرات میں مسابقتی (Antitrust) قوانین اور ممکنہ قانونی خدشات کو دور کرنے پر توجہ مرکوز رکھی گئی ہے تاکہ باضابطہ درخواست سے قبل تمام رکاوٹیں ختم کی جا سکیں۔ اگرچہ کمپنیوں نے ابھی تک باضابطہ درخواست جمع نہیں کرائی، تاہم یورپی حکام کو توقع ہے کہ آئندہ چند ہفتوں میں یورپی کمیشن کو منظوری کی حتمی فائل پیش کر دی جائے گی۔