امریکی ریاست اوریگون کے سکول میں فائرنگ، 4 افراد ہلاک، حملہ آور بھی مارا گیا

امریکی ریاست اوریگون (Oregon) کے ایک پرائمری اسکول میں ہونے والے فائرنگ کے اندوہناک واقعے میں چار افراد ہلاک ہو گئے ہیں، جبکہ حملہ آور بھی موقع پر ہی مارا گیا ہے۔

عالمی میڈیا کے مطابق یہ خونریز واقعہ ریاست اوریگون کے شہر بینڈ (Bend) میں واقع سلور ریل ایلیمنٹری اسکول (Silver Rail Elementary School) میں پیش آیا۔ بینڈ پولیس کی ترجمان شیلا ملر نے واقعے کی تصدیق کرتے ہوئے بتایا کہ فائرنگ کرنے والا شخص بھی ہلاک ہو چکا ہے۔ اطلاعات کے مطابق سیکیورٹی اہلکاروں کے اسکول میں داخل ہوتے ہی حملہ آور کو گولی لگے ہوئے حالت میں گرتے دیکھا گیا، تاہم فوری طور پر یہ واضح نہیں ہو سکا کہ اسے پولیس نے نشانہ بنایا یا اس نے خود کو گولی ماری۔

واقعے کے فوراً بعد پولیس اور سیکیورٹی اداروں نے اسکول کی مکمل تلاشی لے کر بچوں اور عملے کو بحفاظت باہر نکال لیا۔ پولیس کے مطابق فی الحال حملہ آور کی شناخت اور واقعے کا بنیادی محرک سامنے نہیں آ سکا، جبکہ ہلاک ہونے والوں کے نام بھی جاری نہیں کیے گئے۔ اوریگون کے محکمہ تعلیم کے مطابق مذکورہ اسکول پورٹ لینڈ سے 160 کلو میٹر جنوب مشرق میں واقع ہے جہاں 459 بچے زیرِ تعلیم ہیں۔ انتظامیہ اور قانون نافذ کرنے والے اداروں نے واقعے کی جامع تحقیقات شروع کر دی ہیں۔