ایران کی سعودیہ اور یمن میں اختلافات ختم کرانے کیلئے سفارتی کردار ادا کرنیکی پیشکش

ایران نے سعودی عرب اور یمن کے درمیان طویل عرصے سے جاری تنازع اور اختلافات کو ختم کرانے کے لیے اپنے مثبت سفارتی کردار ادا کرنے کی باقاعدہ پیشکش کر دی ہے، اور واضح کیا ہے کہ فریقین کی درخواست پر تہران اپنے تمام سفارتی وسائل بروئے کار لانے کے لیے تیار ہے۔

تہران میں صحافیوں سے گفتگو کرتے ہوئے ایرانی وزارتِ خارجہ کے ترجمان اسماعیل بقائی نے سعودی عرب اور یمن تنازع پر ایران کا موقف بیان کیا۔ انہوں نے یمن کی جانب سے سعودی عرب کے خلاف ہونے والی جوابی کارروائیوں میں ایران کے ملوث ہونے کے الزامات کو سختی سے مسترد کر دیا۔

اسماعیل بقائی نے کہا کہ ایران ہمیشہ سے علاقائی تنازعات کے پرامن حل کے لیے اپنی سفارتی صلاحیتیں استعمال کرنے کا حامی رہا ہے اور اگر دونوں فریقین باقاعدہ درخواست کریں تو تہران ثالثی کے لیے مکمل طور پر تیار ہے۔ ایرانی ترجمان نے مزید زور دیا کہ خطے کے تمام ممالک اور اسلامی دنیا سے یہ توقع کی جاتی ہے کہ وہ اس تنازع کے مستقل خاتمے اور مشرقِ وسطیٰ میں کشیدگی کم کرنے کے لیے فوری اور سنجیدہ اقدامات کریں۔