یمن کے صدارتی محل پر حوثیوں کے 5 میزائل حملے، 2 سکیورٹی اہلکار جاں بحق

یمن کے جنوبی ساحلی شہر عدن میں واقع صدارتی محل (معاشیق کمپلیکس) پر حوثی باغیوں کے یکے بعد دیگرے میزائل حملوں میں 2 سیکیورٹی اہلکار جاں بحق ہو گئے، تاہم حملے کے وقت محل کی عمارت میں موجود یمنی وزیرِ اعظم اور کابینہ کے دیگر تمام اہم ارکان محفوظ رہے۔

یمنی حکام اور وزیرِ اطلاعات معمر الاریانی کے مطابق، حوثیوں نے جمعرات کے روز معاشیق صدارتی کمپلیکس کو نشانہ بناتے ہوئے مجموعی طور پر 5 کروز میزائل داغے۔ دوسری جانب حوثیوں کے عسکری ترجمان یحییٰ سریع نے حملے کی ذمہ داری قبول کرتے ہوئے دعویٰ کیا ہے کہ انہوں نے صدارتی کمپلیکس کے اندر موجود سعودی ملٹری آپریشنز ہیڈکوارٹرز اور اسلحہ خانے کو کامیابی سے نشانہ بنایا ہے۔

اس حملے میں 2 سیکیورٹی اہلکاروں کی شہادت کی تصدیق کی گئی ہے، تاہم یمنی حکومت کے اعلیٰ حکام، بشمول وزیرِ اعظم، کو بحفاظت محفوظ مقام پر منتقل کر دیا گیا ہے۔ حوثیوں کے اس حملے سے بین الاقوامی سطح پر تسلیم شدہ یمنی حکومت اور حوثی مخالف اتحادی فورسز کے درمیان جاری کشیدگی میں مزید شدّت آنے کا خدشہ ظاہر کیا جا رہا ہے۔