افغان سرزمین کا استعمال روکنے کی ذمہ داری طالبان پرعائد ہوتی ہے: وزارت اطلاعات

پاکستان کی وزارت اطلاعات و نشریات نے افغان طالبان حکومت پر زور دیا ہے کہ وہ محض بیان بازی سے توجہ ہٹانے کے بجائے افغانستان میں موجود دہشت گردی کے ٹھوس شواہد کا سنجیدگی سے جواب دے اور پناہ گاہوں کے خلاف قابلِ تصدیق اقدامات کرے۔ وزارت اطلاعات نے اپنے اہم بیان میں واضح کیا کہ افغانستان کی سرزمین سے پاکستان پر ہونے والے دہشت گردانہ حملے کابل حکومت کی ناکامی کا منہ بولتا ثبوت ہیں، جبکہ اقوام متحدہ کی سلامتی کونسل (UNSC) کی رپورٹ نے بھی افغانستان میں ٹی ٹی پی (TTP) کے 6 ہزار کارندوں کی موجودگی اور افغان طالبان کی معاونت کی تصدیق کی ہے۔ بیان میں افغان حکومت کی جانب سے لڑکیوں کی تعلیم پر پابندیوں اور بنیادی انسانی حقوق کی خلاف ورزیوں کو بھی تنقید کا نشانہ بنایا گیا۔ ترجمان کا کہنا تھا کہ پاکستان مذاکرات اور امن کا خواہاں ہے تاہم افغان حکومت کو انسدادِ دہشت گردی کے وعدے پورے کرنے ہوں گے، جبکہ پاکستان اپنے شہریوں اور سرحدوں کی دفاع کے لیے تمام ضروری اور سخت اقدامات کا پورا حق رکھتا ہے۔