پی ٹی آئی سیاسی و کور کمیٹی کا مشترکہ اجلاس، گورنر راج یا ایمرجنسی کے ممکنہ نفاذ کی مخالفت

پاکستان تحریک انصاف (پی ٹی آئی) نے خیبر پختونخوا میں وفاقی حکومت کی جانب سے ممکنہ گورنر راج یا ایمرجنسی کے نفاذ کی شدید الفاظ میں مخالفت کر دی ہے۔ پشاور میں منعقدہ پی ٹی آئی کی سیاسی کمیٹی اور کور کمیٹی کے اہم مشترکہ اجلاس کا باضابطہ اعلامیہ جاری کر دیا گیا ہے، جس میں واضح کیا گیا ہے کہ خیبر پختونخوا میں کسی بھی قسم کا غیر آئینی اقدام یا ایمرجنسی کا نفاذ صوبے کے عوام کے جمہوری مینڈیٹ اور آئینی حقوق پر براہِ راست حملہ تصور کیا جائے گا۔

اعلامیے کے مطابق تحریک انصاف نے ممکنہ گورنر راج کی مخالفت کرنے والی دیگر اپوزیشن جماعتوں بالخصوص عوامی نیشنل پارٹی (ANP)، جمعیت علمائے اسلام (JUI-F) اور جماعتِ اسلامی کے جمہوری مؤقف کو سراہا اور تمام سیاسی قوتوں پر آئین کی بالادستی کے لیے یکجا ہونے پر زور دیا۔ اجلاس میں انسدادِ دہشت گردی کے لیے صوبائی اسمبلی کی قراردادوں اور عوامی نمائندوں کی مشاورت کو بنیادی اہمیت دینے کا مطالبہ بھی کیا گیا۔ اس کے علاوہ پی ٹی آئی کور کمیٹی نے وزیراعلیٰ خیبرپختونخوا سہیل آفریدی کی قیادت اور ان کے اسلام آباد کی جانب جاری لانگ مارچ پر مکمل اعتماد کا اظہار کرتے ہوئے واضح کیا کہ وزیراعلیٰ کی عدم شرکت محض سرکاری مصروفیات کے باعث تھی اور پارٹی صفوں میں کسی قسم کے اختلافات کا تاثر سراسر بے بنیاد ہے۔