امریکا کی یوکرین کو ہتھیاروں کی فراہمی اور انٹیلی جنس تبادلہ بند کرنے کی دھمکی

امریکا نے یوکرین پر دباؤ مزید سخت کرتے ہوئے کیف کو دھمکی دی ہے کہ اگر روسی توانائی تنصیبات پر حملے بند نہ کیے گئے تو یوکرین کو فوجی امداد، ہتھیاروں کی فراہمی اور انٹیلی جنس معلومات کا تبادلہ مکمل طور پر معطل کر دیا جائے گا۔ معتبر بین الاقوامی اخبار ‘فنانشل ٹائمز’ کی رپورٹ کے مطابق واشنگٹن یوکرین کو دفاعی سازوسامان اور ہتھیاروں کی خریداری میں مالی و انتظامی مدد فراہم کرنے والے نظام کو بھی معطل کرنے پر سنجیدگی سے غور کر رہا ہے۔

رپورٹ میں بتایا گیا ہے کہ امریکا نہ صرف یوکرین بلکہ اپنے یورپی اتحادیوں پر بھی مسلسل یہ زور دے رہا ہے کہ روس کی آئل ریفائنریز، پائپ لائنز اور دیگر اہم توانائی تنصیبات کو نشانہ بنانے والے فضائی اور ڈرون حملے فوری طور پر روکے جائیں۔ امریکی انتظامیہ کے ان سخت اقدامات کا بنیادی مقصد کیف کو اس بات پر مجبور کرنا ہے کہ وہ روسی توانائی کے بنیادی ڈھانچے پر حملے روک دے تاکہ عالمی منڈی میں تیل کی سپلائی اور قیمتوں کو مزید عدم استحکام سے بچایا جا سکے۔