یو اے ای میں بارش کا امکان، تیز ہواؤں اور گردوغبار کی پیشگوئی

متحدہ عرب امارات (یو اے ای) کے قومی مرکز برائے موسمیات (NCM) نے ملک میں 11 سے 14 اکتوبر تک مختلف علاقوں میں بارش کا امکان ظاہر کرتے ہوئے الرٹ جاری کر دیا ہے۔ موسمیاتی ادارے کے مطابق اس دوران تیز ہواؤں کے باعث گردوغبار اڑنے اور بعض ساحلی و اندرونی مقامات پر گہری دھند کی صورتحال بھی پیدا ہو سکتی ہے۔ بین الاقوامی خبر رساں ادارے ‘خلیج ٹائمز’ کی رپورٹ کے مطابق محکمہ موسمیات کے تازہ ترین بلیٹن میں بتایا گیا ہے کہ 11 اکتوبر کو دوپہر کے بعد مشرقی اور جنوبی علاقوں میں بارش برسانے والے بادل بننے کی توقع ہے، جبکہ رات کے وقت نمی کے تناسب میں شدید اضافے سے ساحلی اور اندرونی علاقوں میں ہلکی سے شدید دھند چھا سکتی ہے۔

پیشگوئی کے مطابق 12 اکتوبر کو اندرونی علاقوں میں دوپہر کے بعد پھر بادل بننے کی توقع ہے، جہاں ہواؤں کی رفتار 45 کلومیٹر فی گھنٹہ تک پہنچ سکتی ہے جس سے بصارت متاثر ہونے کا اندیشہ ہے۔ جبکہ 13 اکتوبر کو مشرقی و مغربی علاقوں اور 14 اکتوبر کو بھی مختلف مقامات پر بارش کی توقع کی جا رہی ہے، جہاں ہواؤں کی رفتار 40 کلومیٹر فی گھنٹہ تک رہ سکتی ہے۔

محکمہ موسمیات کے مطابق بحیرہ عرب اور خلیج عمان میں سمندری لہریں معمول کے مطابق ہلکی رہیں گی۔ تاہم ادارے نے شہریوں، خصوصاً ڈرائیوروں اور سڑکوں پر سفر کرنے والوں کو ہدایت کی ہے کہ وہ خراب موسم اور دھند کے دوران سخت احتیاطی تدابیر اختیار کریں اور سفر سے قبل تازہ ترین سرکاری موسمی اپ ڈیٹس کو لازمی مدنظر رکھیں۔