وزیر داخلہ کی طالبہ لائبہ اعجاز کے گھر آمد، والدین سے اظہار تعزیت کیا

وفاقی وزیر داخلہ محسن نقوی، وزیر مملکت برائے داخلہ طلال چودھری اور اسلام آباد پولیس کے اعلیٰ حکام کے ہمراہ، ویزا فراڈ کے نتیجے میں انتقال کر جانے والی طالبہ لائبہ اعجاز کی رہائش گاہ پہنچے، جہاں انہوں نے متاثرہ خاندان اور والدین سے ملاقات کی اور گہرے دکھ اور تعزیت کا اظہار کیا۔ اس موقع پر لائبہ اعجاز کے والد نے وزیر داخلہ کو دھوکہ دہی کی تمام تفصیلات اور پیش آنے والے دردناک واقعات سے آگاہ کیا۔

وزیر داخلہ محسن نقوی نے متاثرہ والدین کو مکمل تعاون اور انصاف کی فراہمی کی یقین دہانی کرواتے ہوئے کہا کہ وزیراعظم نے خود ملزمان کی جلد از جلد گرفتاری اورانہیں کیفرِ کردار تک پہنچانے کی سخت ہدایت جاری کی ہے۔ بعد ازاں میڈیا سے گفتگو کرتے ہوئے محسن نقوی کا کہنا تھا کہ یہ کیس وفاقی حکومت اور تمام تحقیقاتی اداروں کے لیے ایک بڑا “ٹیسٹ کیس” ہے۔ انہوں نے واضح کیا کہ اسلام آباد پولیس اور ایف آئی اے (FIA) دونوں مل کر تفتیش کر رہی ہیں اور ملزمان کو قانون کے مطابق سخت ترین سزا دلوائی جائے گی۔ وزیر داخلہ نے مزید کہا کہ حکومت کے موثر اقدامات سے ملک میں انسانی اسمگلنگ اور جعلی ویزا ایجنٹوں کے نیٹ ورک میں واضح کمی آئی ہے اور اس کیس کو عبرت کا نشان بنایا جائے گا۔