لاہور ہائیکورٹ نے آئل مل ڈی سیل کرنے کا مجسٹریٹ کا حکم کالعدم قرار دے دیا

لاہور ہائیکورٹ کے جسٹس غلام سرور نہنگ نے پنجاب فوڈ اتھارٹی کی آئینی درخواست منظور کرتے ہوئے بورے والا میں واقع آئل مل کو ڈی سیل کرنے کا مجسٹریٹ کا حکم کالعدم قرار دے دیا ہے۔ 10 صفحات پر مشتمل تحریری فیصلے میں عدالت نے واضح کیا کہ پنجاب فوڈ اتھارٹی ایکٹ 2011 کے تحت ایمرجنسی پروہیبیشن آرڈر کو برقرار رکھنے، تبدیل کرنے یا ختم کرنے کا قانونی اختیار صرف فوڈ اتھارٹی (ڈی جی پنجاب فوڈ اتھارٹی) کو حاصل ہے اور قانون میں دیے گئے اختیار کے بغیر مجسٹریٹ ایسا انتظامی حکم جاری نہیں کر سکتا۔ عدالت نے مزید قرار دیا کہ قانون میں مقررہ طریقہ کار کو نظرانداز کر کے کسی غیر مجاز فورم سے ریلیف حاصل نہیں کیا جا سکتا۔ تاہم لاہور ہائیکورٹ نے مل مالکان کو قانونی طریقہ کار کے مطابق فوڈ اتھارٹی کے مجاز فورم سے رجوع کرنے کی اجازت دے دی ہے۔