آٹے کی قیمتوں میں اضافے پر مریم نواز برہم، 10 ارب روپے کی سبسڈی منظور

وزیراعلیٰ پنجاب مریم نواز شریف نے آٹے کی قیمتوں میں اضافے پر شدید برہمی کا اظہار کرتے ہوئے ہنگامی ویڈیو لنک اجلاس طلب کر لیا اور عوام کو ہر صورت سستے آٹے اور گندم کی فراہمی کا حکم دیا ہے۔ اجلاس میں فلور ملوں کو 3 ہزار 800 روپے فی من کے حساب سے سبسڈائزڈ سرکاری گندم کا کوٹہ بڑھانے کا فیصلہ کیا گیا، جبکہ عوام کو سستا آٹا فراہم کرنے کے لیے وزیراعلیٰ نے 10 ارب روپے کی سبسڈی کی فوری منظوری دے دی۔ مارکیٹ میں مصنوعی مہنگائی اور ذخیرہ اندوزی کے رجحان پر تشویش ظاہر کرتے ہوئے مریم نواز شریف نے متعلقہ حکام کو تمام وسائل بروئے کار لانے کی ہدایت کی اور واضح کیا کہ عوام پر مہنگائی کا بوجھ ناقابلِ برداشت ہے، اس لیے سستے آٹے اور سستی روٹی کی فراہمی میں کسی قسم کی غفلت برداشت نہیں کی جائے گی۔