امریکا نے ایران سے تیل اور پیٹروکیمیکل تجارت پر نئی پابندیاں عائد کردیں

امریکا نے ایران کی تیل اور پیٹروکیمیکل مصنوعات کی تجارت کو محدود کرنے کے لیے نئی پابندیاں عائد کر دی ہیں، جن کی زد میں متحدہ عرب امارات، بھارت، ترکیہ، ایران اور برطانیہ سے وابستہ متعدد کمپنیاں، افراد اور بحری جہاز آ گئے ہیں۔ امریکی محکمہ خارجہ کے مطابق پابندیوں کا مقصد ایران کو اس شعبے سے حاصل ہونے والی آمدنی کے ذرائع کو کمزور کرنا ہے۔ نئی پابندیوں میں بھارت کی ایس ایس پی ایل سلوشنز اور سمودرا میرین سروسز کے ڈائریکٹرز، ترکیہ کی کمپنی نورزاد پیٹروکیمیا کے سی ای او سعید احمد نورزاد، اور یو اے ای کی قائم کردہ کمپنی “عربین پرو میٹیریلز” سمیت کئی شپنگ کمپنیاں اور جہاز بھی شامل ہیں جو مبینہ طور پر ایرانی تیل اور پیٹروکیمیکل مصنوعات کی نقل و حمل اور تجارت میں ملوث تھے۔