فیصل کریم کنڈی کا سہیل آفریدی کو مستعفی ہونے کا مشورہ، لانگ مارچ پر تنقید

گورنر خیبرپختونخوا فیصل کریم کنڈی نے وزیراعلیٰ کو مستعفی ہونے کا مشورہ دیتے ہوئے خبردار کیا ہے کہ اگر 9 مئی جیسے اقدامات دہرانے کی کوشش کی گئی تو اس کے سنگین نتائج بھگتنا ہوں گے۔ ایک بیان میں انہوں نے کہا کہ دہشت گردی کے خلاف جنگ ہماری ریڈ لائن ہے اور صوبے کو دہشت گردوں کے رحم و کرم پر نہیں چھوڑا جا سکتا۔ لانگ مارچ پر شدید تنقید کرتے ہوئے گورنر نے کہا کہ یہ مارچ کسی “سرکس” کی طرح گھوم رہا ہے اور اگر اس کے شرکا میں ہمت ہے تو وہ صوابی کراس کر کے دکھائیں کیونکہ صوابی ان کے لیے “پل صراط” کی حیثیت رکھتا ہے اور وہ ہمیشہ وہاں سے یوٹرن لے لیتے ہیں۔ انہوں نے مزید کہا کہ صوبائی حکومت وفاق سے محاذ آرائی کی بجائے عوام کے جان و مال کے تحفظ پر توجہ دے، کیونکہ وفاق کے بغیر صوبے کا نظام چلانا ممکن نہیں۔