علیمہ خان کیخلاف کیس کا فیصلہ پھر مؤخر، سہیل آفریدی کی درخواست پر سماعت ملتوی

راولپنڈی کی انسدادِ دہشت گردی کی خصوصی عدالت نے پاکستان تحریکِ انصاف کے بانی کی بہن علیمہ خان کے خلاف 26 نومبر کے احتجاج سے متعلق درج مقدمے کا فیصلہ تیسری بار مؤخر کرتے ہوئے اب اسے 16 اکتوبر کو سنانے کی تاریخ مقرر کر دی ہے۔ عدالت کے جج کے خصوصی کورس پر رخصت کے باعث قانونی ٹیم کو تاریخ تبدیل کیے جانے سے آگاہ کیا گیا۔ دوسری جانب، پشاور ہائی کورٹ نے وزیراعلیٰ خیبرپختونخوا سہیل آفریدی، سابق وزیراعلیٰ علی امین گنڈاپور اور دیگر کی 27 درخواستوں پر سماعت وکلا کی تیاری نہ ہونے کے باعث 20 اکتوبر تک ملتوی کر دی ہے۔ سماعت کے دوران عدالت نے ریمارکس دیے کہ صوبے میں اپنی حکومت ہونے کے باوجود ارکان کو اٹھائے جانے کے معاملات پر متعلقہ فورمز سے رجوع کیا جائے، جبکہ اسلام آباد کے دائرہ اختیار سے متعلق عدالت براہ راست حکم جاری نہیں کر سکتی۔