شمالی وزیرستان میں انٹیلی جنس بیسڈ آپریشن، فتنہ الخوارج کے 7 دہشت گرد ہلاک

خیبرپختونخوا میں ‘عزم استحکام’ ویژن کے تحت سکیورٹی فورسز کی کارروائیاں پوری قوت کے ساتھ جاری ہیں۔ سکیورٹی ذرائع کے مطابق شمالی وزیرستان میں ایک انٹیلی جنس بیسڈ آپریشن کے دوران سکیورٹی فورسز نے بھرپور کارروائی کرتے ہوئے 7 خارجی دہشت گردوں کو جہنم واصل کر دیا۔ کارروائی کے دوران ہلاک ہونے والے دہشت گردوں کے قبضے سے بھاری مقدار میں اسلحہ، گولہ بارود اور دھماکہ خیز مواد برآمد ہوا جبکہ ان کے کئی ٹھکانے بھی تباہ کر دیے گئے۔ صدرِ مملکت آصف علی زرداری نے سکیورٹی فورسز کی اس مؤثر کارروائی کو سراہتے ہوئے عزم ظاہر کیا ہے کہ دہشت گردوں کے غیر ملکی سرپرستوں اور مقامی سہولت کاروں کی تمام سازشیں ناکام بنا دی جائیں گی اور ملک سے دہشت گردی کے مکمل خاتمے تک جنگ جاری رہے گی۔