کراچی بندر گاہ سے یورپ کیلئے براہ راست شپنگ سروس بحال

وفاقی وزیرِ بحری امور جنید انوار چوہدری کی خصوصی کاوشوں کے نتیجے میں کراچی بندرگاہ سے یورپ کے لیے براہِ راست ہفتہ وار شپنگ سروس باضابطہ طور پر بحال ہو گئی ہے، جس کے تحت 7 اہم یورپی بندرگاہوں سے پاکستان کا سمندری رابطہ دوبارہ قائم ہو گیا ہے۔

وزارتِ بحری امور کے مطابق معروف شپنگ لائن ‘ایم ایس سی’ (MSC) نے پریمیم آئی پاک (I-PAK) سروس کو دوبارہ فعال کر دیا ہے اور کراچی گیٹ وے ٹرمینل سے یورپ کے لیے مال بردار جہازوں کی ہفتہ وار روانگی شروع ہو چکی ہے۔ اس براہِ راست سروس کی بحالی سے پاکستانی برآمدی صنعت، بالخصوص ٹیکسٹائل سیکٹر کو بڑا مالی و لاجسٹک ریلیف ملے گا اور سامان کی ترسیل کے وقت میں نمایاں کمی آئے گی۔ وفاقی وزیر نے اس اہم کامیابی پر کے پی ٹی (KPT) کی قیادت اور کے جی ٹی ایل (KGTL) کی انتظامیہ کی کاوشوں کو بھی سراہا۔