اسلام آباد پر لشکر کشی کی ہرگز اجازت نہیں دی جاسکتی، تمام وسائل بروئے کار لائیں گے: خواجہ آصف

وفاقی وزیر خواجہ آصف نے واضح کیا ہے کہ حکومت اسلام آباد پر چڑھائی کو روکنے کے لیے تمام دستیاب وسائل بروئے کار لائے گی کیونکہ ہر دو تین ماہ بعد دارالحکومت پر لشکر کشی کی اجازت نہیں دی جا سکتی۔ میڈیا سے گفتگو کرتے ہوئے انہوں نے کہا کہ ہماری اولین ترجیح یہی ہے کہ کسی بھی انتہائی یا آخری آپشن کی طرف نہ جانا پڑے، تاہم صوبائی قیادت ملک دشمن قوتوں کے ساتھ مل کر وفاق پر حملے کی حکمت عملی بنا رہی ہے۔ خواجہ آصف نے الزام عائد کیا کہ کے پی کی موجودہ قیادت کی متشدد پالیسیوں سے خدانخواستہ صوبے کی علیحدگی جیسے خطرات جنم لے سکتے ہیں، اور صوبائی وزیر اعلیٰ سہیل آفریدی صرف اپنی وزارت اعلیٰ بچانے اور سیاسی نمبر بڑھانے کے لیے تصادم کو ہوا دے رہے ہیں۔