گورنر راج آخری آپشن، کوشش کر رہے ہیں اس طرف نہ جائیں: خواجہ آصف

وزیر دفاع خواجہ آصف نے کہا ہے کہ آئین و قانون کے تحت صوبے میں گورنر راج کے نفاذ میں کوئی رکاوٹ موجود نہیں ہے، تاہم حکومت کی بھرپور کوشش ہے کہ اس آخری آپشن تک جانے سے گریز کیا جائے۔ نجی ٹی وی سے خصوصی گفتگو کرتے ہوئے انہوں نے واضح کیا کہ دارالحکومت کو کسی بھی صورت پی ٹی آئی کے رحم و کرم پر نہیں چھوڑا جا سکتا اور نہ ہی طالبان کے ساتھ مل کر اسلام آباد پر کسی قسم کی لشکر کشی کی اجازت دی جائے گی کیونکہ وفاقی دارالحکومت کی حفاظت حکومت کا بنیادی فرض ہے۔ خواجہ آصف کا کہنا تھا کہ اگر ایک فرد کی خوشی کی خاطر ملک کا شیرازہ بکھیرنے کی کوشش کی گئی تو اسے ہرگز قبول نہیں کیا جائے گا۔ انہوں نے مزید کہا کہ خیبرپختونخوا کی موجودہ قیادت سے کسی بھی مثبت توقع سے گریز کیا جا رہا ہے، جبکہ پی ٹی آئی کے اندرونی اختلافات بھی شدت اختیار کر چکے ہیں اور پارٹی کے اندر سے ہی ایک حلقہ اس تنازع کا پرامن حل چاہتا ہے۔