خیبرپختونخوا میں بڑھتی دہشت گردی کو ہر قیمت پر روکنا ہوگا: وزیراعظم

وزیراعظم محمد شہباز شریف سے وفاقی وزیر امور کشمیر و گلگت بلتستان انجینئر امیر مقام نے ملاقات کی، جس میں آزاد جموں و کشمیر، گلگت بلتستان اور خیبر پختونخوا کے امور پر تفصیلی تبادلہ خیال کیا گیا۔ ملاقات کے دوران وزیراعظم کا کہنا تھا کہ خیبر پختونخوا میں بڑھتی ہوئی دہشت گردی کو ہر قیمت پر روکنا ہوگا، اور حکومت کی یہ شدید خواہش ہے کہ کے پی کے عوام بھی ملک کے دوسرے حصوں کی طرح ترقی و خوشحالی کے ثمرات سے مستفید ہوں۔ انہوں نے خیبر پختونخوا کے عوام کی دہشت گردی کے خلاف دی جانے والی قربانیوں کو زبردست خراج تحسین پیش کیا۔ اس کے علاوہ وزیراعظم نے آزاد کشمیر اور گلگت بلتستان کے امور پر بریفنگ لیتے ہوئے وہاں کے عوام کو بنیادی سہولیات اور فلاح و بہبود کی فراہمی کے لیے مؤثر اقدامات جاری رکھنے کی ہدایت کی۔