لانگ مارچ، دھرنے: پشاور میں تاجر برادری کا خیبر پختونخوا حکومت کیخلاف احتجاج

پشاور میں تاجر برادری خیبر پختونخوا حکومت کی مسلسل احتجاجی سیاست، لانگ مارچ اور دھرنوں کے خلاف سراپا احتجاج بن کر سڑکوں پر آ گئی ہے۔ صوبائی اسمبلی چوک پشاور میں تاجروں اور دکانداروں کی بڑی تعداد نے جمع ہو کر صوبائی حکومت کی پالیسیوں کے خلاف شدید احتجاجی مظاہرہ کیا اور نعرے بازی کی، جس سے تجارتی مراکز اور ٹریفک کی روانی شدید متاثر ہوئی۔

مظاہرین کا کہنا تھا کہ خیبر پختونخوا حکومت اسلام آباد کی طرف لانگ مارچ اور روز بروز کے دھرنوں کی بجائے صوبے کے حقیقی عوامی و معاشی مسائل کے حل پر توجہ دے۔ تاجر رہنماؤوں نے موقف اختیار کیا کہ مسلسل سیاسی کشیدگی اور احتجاج کی وجہ سے صوبے میں کاروبار مکمل طور پر تباہ ہو چکا ہے، روزگار کے مواقع ختم ہو رہے ہیں اور صوبے کا کوئی پرسان حال نہیں ہے۔ انہوں نے دھمکی دی کہ اگر تاجروں کے معاشی تحفظ اور تاجر دوست ماحول کی فراہمی پر فوری اقدامات نہ کیے گئے تو احتجاج کا دائرہ کار مزید پھیلایا جائے گا۔