حکومت اپوزیشن مذاکرات کا نتیجہ جلد سامنے آئے گا: شوکت یوسف زئی

پاکستان تحریک انصاف خیبرپختونخوا کے ترجمان شوکت یوسف زئی نے کہا ہے کہ حکومت اور اپوزیشن کے درمیان جاری مذاکرات کا نتیجہ جلد سامنے آئے گا، کیونکہ اس وقت پوری قوم ان اہم مذاکرات پر نظریں جمائے بیٹھی ہے۔ اپنے بیان میں امید ظاہر کرتے ہوئے ان کا کہنا تھا کہ ملک میں جاری سیاسی ڈیڈلاک ختم ہونا چاہیے اور توقع ہے کہ قوم کو جلد کوئی اچھی خبر سننے کو ملے گی۔

ترجمان پی ٹی آئی نے واضح کیا کہ جب تک پارٹی کے تمام مطالبات تسلیم نہیں کیے جاتے، لانگ مارچ کا سلسلہ ختم نہیں ہوگا۔ انہوں نے وفاقی حکومت پر زور دیا کہ اب وقت آ گیا ہے کہ تحریک انصاف کو سیاسی سپیس دی جائے۔ شوکت یوسف زئی نے انتباہ بھی کیا کہ حکومت مطالبات تسلیم کرنے اور فیصلے کرنے میں جتنی تاخیر کرے گی، اس سے ملکی معیشت اور سیاسی استحکام کو اتنا ہی زیادہ نقصان پہنچے گا۔