ایران کے متعدد سابق حکومتی عہدیداران کا حکومت کو خط، این پی ٹی معاہدے سے نکلنے کا مطالبہ

ایران کے 30 سے زائد سابق اعلیٰ حکومتی عہدیداروں نے ایک مشترکہ کھلے خط کے ذریعے تہران حکومت سے مطالبہ کیا ہے کہ وہ جوہری ہتھیاروں کے عدم پھیلاؤ کے عالمی معاہدے “این پی ٹی” (NPT) سے فوری طور پر الگ ہو جائے۔ خط پر دستخط کرنے والی شخصیات میں سابق وزرا اور سابق نائب صدور شامل ہیں، جن کا مؤقف ہے کہ موجودہ جیو پولیٹیکل صورتحال اور عالمی دباؤ کے پیشِ نظر اب ایران کا اس معاہدے سے منسلک رہنا ملکی سلامتی اور قومی مفاد میں نہیں رہا۔ اس خط کے ذریعے ایران کی سپریم قومی سلامتی کونسل، حکومت اور پارلیمنٹ سے اپیل کی گئی ہے کہ وہ این پی ٹی کے تحت بین الاقوامی ایٹمی توانائی ایجنسی کے ساتھ تمام تر تعاون روکیں اور معاہدے سے باضابطہ قانونی علیحدگی کا عمل شروع کریں۔

خط پر دستخط کرنے والوں میں سابق صدر محمود احمدی نژاد کے دور کے نائب صدور محمد رضا میر تاج الدینی، محمد رضا رحیمی اور مسعود زریبافان شامل ہیں۔ اس کے علاوہ سابق وزیر اطلاعات حیدر مصلحی اور مرحوم صدر ابراہیم رئیسی کے دورِ حکومت کے نائب صدور امیر حسین قاضی زادہ ہاشمی، میثم لطیفی اور انسیہ خزعلی نے بھی اس مطالبے کی توثیق کی ہے۔ واضح رہے کہ ایران 1970ء میں غیر ایٹمی ملک کے طور پر این پی ٹی معاہدے کا رکن بنا تھا، جس کے تحت اس نے جوہری ہتھیار نہ بنانے اور اپنے ایٹمی پروگرام کو صرف پرامن مقاصد تک محدود رکھنے کی عالمی پابندی قبول کی تھی۔