ایران نے آبنائے ہرمز پر امریکی کنٹرول کے دعوے مسترد کر دیے

ایران کی پارلیمنٹ کے اسپیکر محمد باقر قالیباف نے آبنائے ہرمز پر امریکی کنٹرول اور تیل کی بلا تعطل ترسیل کے امریکی دعؤوں کو سراہسر من گھڑت قرار دیتے ہوئے سخت الفاظ میں مسترد کر دیا ہے۔ اپنے ایک خصوصی بیان میں محمد باقر قالیباف نے کہا کہ عالمی مارکیٹ میں خام تیل کی مسلسل بڑھتی ہوئی قیمتیں خود امریکی بیانیے اور ٹرمپ کے دعؤوں کی کھل کر تردید کر رہی ہیں۔ ان کا کہنا تھا کہ تیل کی موجودہ قیمتیں کشیدگی اور جنگ کی شروعات سے قبل کی سطح کے مقابلے میں 35 ڈالر فی بیرل تک زیادہ ہیں، جو اس بات کا واضح ثبوت ہے کہ سمندری گزرگاہ پر حالات معمول کے مطابق نہیں ہیں۔

ایرانی اسپیکر نے امریکہ پر شدید تنقید کرتے ہوئے کہا کہ امریکی پروپیگنڈا مشین حقائق کو توڑ مروڑ کر اور مسخ کر کے عالمی برادری کے سامنے پیش کر رہی ہے۔ باقر قالیباف نے چیلنج دیتے ہوئے کہا کہ یا تو عالمی معیشت اور تیل کی مارکیٹ کسی اندھیر نگری کا شکار ہو چکی ہے یا پھر امریکی حکومت کا یہ بیانیہ مکمل طور پر غلط اور بے بنیاد ہے۔ ان کے اس بیان سے یہ بات واضح ہوتی ہے کہ آبنائے ہرمز میں کشیدگی برقرار ہے اور تہران اپنے موقف سے پیچھے ہٹنے کو تیار نہیں۔