جنگ دوبارہ شروع ہوئی تو بحرہند میں بھی امریکی جنگی جہازوں کو نشانہ بنائیں گے: پاسداران انقلاب

ایران کی پاسدارانِ انقلاب اسلامی (IRGC) کی بحریہ کے شعبہ سیاسی امور کے نائب علی محمدی نے امریکہ کو سخت خبردار کرتے ہوئے کہا ہے کہ اگر خطے میں عسکری کشیدگی یا جنگ کا دوبارہ آغاز ہوا تو ایرانی افواج نہ صرف آبنائے ہرمز بلکہ بحرِ ہند تک امریکی جنگی جہازوں اور ایئر کرافٹ کیریئرز کو بھی براہِ راست نشانہ بنا کر تباہ کر دیں گی۔ ایرانی میڈیا کے مطابق علی محمدی نے امریکی صدر ڈونلڈ ٹرمپ کے بیانات پر ردِعمل دیتے ہوئے سوال اٹھایا کہ اگر امریکی صدر واقعی آبنائے ہرمز کو اپنی ملکیت يا اپنے کنٹرول کا علاقہ سمجھتے ہیں تو امریکی بحری جہاز اور جنگی بیڑے اس شاہراہ سے غائب کیوں ہیں؟

علی محمدی نے مزید چیلنج کرتے ہوئے کہا کہ اگر امریکہ عالمی سطح پر آبنائے ہرمز پر اپنے تسلط کا دعویٰ کرتا ہے تو اسے اپنے کسی ڈسٹرائر یا عسکری بحری جہاز کو اس سمندری علاقے کے قریب لا کر دکھانا چاہیے۔ انہوں نے واضح کیا کہ پاسدارانِ انقلاب کی سمندری حد اور صلاحیت صرف خلیج فارس تک محدود نہیں رہی بلکہ کسی بھی ممکنہ جارحیت کی صورت میں بحرِ ہند میں موجود امریکی بحری اثاثے بھی ایرانی میزائلوں اور ڈرونز کی زد میں ہوں گے۔