کانگو میں کارگو طیارہ گر کر تباہ، آڈیٹر جنرل سمیت 14 فوجی افسران ہلاک

وسطی افریقی ملک جمہوریہ ڈیموکریٹک کانگو میں فوج کا ایک کارگو طیارہ فنی خرابی کے باعث گر کر تباہ ہو گیا، جس کے نتیجے میں طیارے میں سوار تمام 14 افراد ہلاک ہو گئے۔ صوبہ کوانگو کے نائب گورنر ریمی ساکی بوکیندا کے مطابق طیارہ جنوب مغربی شہر کیک وٹ سے دارالحکومت کنشاسا کی جانب گامزن تھا کہ اچانک تکنیکی خرابی پیدا ہوئی۔ پائلٹ نے کینج شہر میں ہنگامی لینڈنگ کی کوشش کی، تاہم باقاعدہ رن وے نہ ہونے کی وجہ سے طیارہ قریبی رہائشی علاقے میں جا گرا۔

نائب گورنر نے تصدیق کی کہ حادثے میں ہلاک ہونے والوں میں فوج کے آڈیٹر جنرل، جنرل لکیولیا باکومی، دیگر اعلیٰ عسکری افسران اور شہری شامل ہیں۔ تمام 14 افراد موقع پر ہی دم توڑ گئے جبکہ شدید آگ لگنے کے باعث 12 لاشیں ناقابلِ شناخت حد تک جل گئیں۔ یہ کارگو طیارہ شمالی علاقے میں باغی تنظیموں (بشمول روانڈا کی حمایت یافتہ ایم 23) کے خلاف برسرِ پیکار عسکری دستوں کو امدادی و جنگی سامان پہنچانے کی ڈیوٹی پر مامور تھا۔ کانگو کے محکمہ ہوابازی نے حادثے کی باقاعدہ تحقیقات کا آغاز کر دیا ہے۔