نجف سے ایران آنے اور جانیوالی تمام پروازیں معطل کردی گئیں

عراق انتظامیہ نے تہران اور نجف کے درمیان فضائی رابطہ منقطع کرتے ہوئے نجف انٹرنیشنل ایئرپورٹ سے ایران آنے اور جانے والی تمام پروازوں کو غیر معینہ مدت کے لیے معطل کر دیا ہے۔ نجف ایئرپورٹ حکام کی جانب سے جاری بیان کے مطابق یہ اقدام اعلیٰ سرکاری حکام کی پیشگی ہدایات کی روشنی میں اٹھایا گیا ہے۔ انتظامیہ کا کہنا ہے کہ پروازوں کی دوبارہ بحالی سے متعلق متعلقہ حکام سے نئی ہدایات موصول ہوتے ہی تمام فضائی کمپنیوں کو آگاہ کر دیا جائے گا۔

دوسری جانب ایرانی سول ایوی ایشن اتھارٹی نے تصدیق کی ہے کہ نجف کے علاوہ بغداد ایئرپورٹ نے بھی ایرانی ایئرلائنز کی آمد و رفت اور پروازوں کے آپریشن پر پابندی عائد کر دی ہے۔ نجف اور بغداد ایئرپورٹس سے پروازوں کی اچانک معطلی کے باعث دونوں ہمسایہ ممالک کے درمیان سفر کرنے والے زائرین اور مسافروں کی آمد و رفت شدید متاثر ہونے کا خدشہ پیدا ہو گیا ہے، جس سے ہزاروں زائرین کو مشکلات کا سامنا کرنا پڑ سکتا ہے۔