موسمیاتی اہداف کے ثمرات عوام اور مقامی کمیونٹیز تک پہنچنے چاہیے، وزیرخزانہ

نیویارک میں موسمیاتی تبدیلی سے متعلق منعقدہ ایک اہم کانفرنس سے خطاب کرتے ہوئے وفاقی وزیرِ خزانہ محمد اورنگزیب نے زور دیا ہے کہ موسمیاتی اہداف کے حقیقی ثمرات عام عوام اور مقامی کمیونٹیز تک لازمی پہنچنے چاہئیں۔ انہوں نے اس بات پر روشنی ڈالی کہ ماحولیاتی چیلنجز سے نمٹنے کے لیے مؤثر پالیسیوں پر عملدرآمد اور موسمیاتی منصوبوں کے لیے مالی وسائل تک آسان رسائی ناگزیر ہے۔

وزیرِ خزانہ کا کہنا تھا کہ اب وقت آ گیا ہے کہ مباحثوں کو محض باتوں تک محدود نہ رکھا جائے بلکہ عملی اقدامات پر اتفاقِ رائے پیدا کیا جائے۔ ملکی سطح پر منصوبوں کو عملی جامہ پہنانے کی صلاحیت کو بڑھانا ہو گا جس کے لیے قومی اور عالمی سطح پر وسائل کو متحرک کیا جا رہا ہے۔ انہوں نے بتایا کہ بین الاقوامی مالیاتی اداروں اور مختلف موسمیاتی فنڈز سے فنڈنگ حاصل کرنے کی کوششیں تیزی سے جاری ہیں۔

محمد اورنگزیب نے اعتراف کیا کہ مختلف اداروں کے مابین رابطے کا فقدان اور سرمایہ کاری کے قابل پختہ منصوبوں کی کمی موسمیاتی فنڈز کے حصول میں بڑی رکاوٹیں ہیں۔ انہوں نے مثال دی کہ 2022 کے تباہ کن سیلاب کے بعد بھی بعض عالمی مالیاتی وسائل اچھے اور قابلِ عمل منصوبوں کی عدم موجودگی کی وجہ سے مکمل استعمال نہیں ہو سکے تھے۔