راولپنڈی: وکیل فیصل ملک کا علیمہ خانم کے مقدمے میں دفاع کا موقع نہ ملنے پر شدید اظہارِ تشویش

راولپنڈی میں انسدادِ دہشت گردی عدالت (ATC) کے باہر میڈیا سے گفتگو کرتے ہوئے علیمہ خانم کے وکیل فیصل ملک نے دعویٰ کیا ہے کہ عدالت میں تاحال علیمہ خانم کی جانب سے کوئی بحث نہیں سنی گئی، جبکہ ضابطہ فوجداری کی دفعہ 265-G کے تحت دفاع کا مؤقف سننا قانوناً لازمی ہے۔ انہوں نے کہا کہ عدالت نے یقین دہانی کرائی تھی کہ علیمہ خانم کے وکیل کی بحث سنی جائے گی، مگر پراسیکیوشن کی بحث سننے کے باوجود دفاع کو اپنا مؤقف پیش کرنے کا موقع فراہم نہیں کیا گیا۔

فیصل ملک کا کہنا تھا کہ وکیل کی بحث سنے بغیر فیصلہ محفوظ کرنا غیر قانونی ہے اور یہ اقدام علیمہ خانم کو ان کے بنیادی قانونی حق سے محروم کرنے کے مترادف ہے۔ انہوں نے بتایا کہ جج کے اسٹاف نے درخواست وصول کرنے سے انکار کیا، جس کے بعد وہ درخواست وصول کرانے کے لیے ڈیوٹی جج سے رجوع کر رہے ہیں۔

وکیل صفائی نے دعویٰ کیا کہ کیس میں پیش کی گئی ڈی وی ڈی میں علیمہ خانم کا نام تک موجود نہیں ہے، اور یو ایس بی قانونی طور پر کیس کا حصہ نہیں بن سکتی جسے وہ عدالت میں ثابت کریں گے۔ ان کا مزید کہنا تھا کہ مقدمے میں پیش کیے گئے اخباری تراشے بھی قابلِ قبول نہیں ہیں کیونکہ کوئی بھی صحافی بطور گواہ عدالت میں پیش نہیں ہوا۔ فیصل ملک نے عزم ظاہر کیا کہ وہ آئین اور قانون کے دائرے میں رہتے ہوئے اپنے مؤکل کے حقِ دفاع کے لیے بھرپور جدوجہد جاری رکھیں گے۔