لبنانی وزیراعظم کی ایرانی صدر سے ملاقات، خودمختاری کے احترام پر زور

اقوامِ متحدہ کی جنرل اسمبلی کے اجلاس کے موقع پر لبنان کے وزیراعظم نواف سلام نے ایرانی صدر مسعود پزشکیان سے اہم ملاقات کی ہے۔ ملاقات کے دوران لبنانی وزیراعظم نے واضح اور پرعزم موقف اختیار کرتے ہوئے کہا کہ لبنان اب کسی بھی صورت علاقائی جنگوں کا میدانِ جنگ نہیں بننا چاہتا اور ان کی حکومت ایران کے ساتھ باہمی احترام پر مبنی تعلقات کا ایک نیا باب کھولنے کی خواہاں ہے۔

لبنانی وزیراعظم نواف سلام نے ایرانی صدر پر زور دیا کہ تہران کو لبنان کے اندرونی معاملات میں مداخلت سے گریز کرنا چاہیے اور دونوں ممالک کی خودمختاری اور آزاد حیثیت کا احترام کرنا چاہیے۔ انہوں نے مزید کہا کہ مسلسل عدم استحکام اور تنازعات کی وجہ سے لبنان پہلے ہی اپنی سلامتی، قومی استحکام اور معیشت کے حوالے سے ایک بھاری اور دردناک قیمت ادا کر چکا ہے، لہٰذا اب ترجیح ملکی خودمختاری کا تحفظ ہے۔