اسلام آباد اور پنجاب کے مختلف اضلاع میں رینجرز تعیناتی کی منظوری

وفاقی وزارتِ داخلہ نے امن و امان کی صورتِ حال کو برقرار رکھنے کے لیے چیف کمشنر اسلام آباد اور حکومتِ پنجاب کی سفارشات و درخواست پر اسلام آباد اور پنجاب کے مختلف اضلاع میں پاکستان رینجرز کی تعیناتی کی باضابطہ منظوری دے دی ہے۔ وزارتِ داخلہ کی جانب سے جاری کردہ نوٹیفکیشن میں رینجرز کو قانون کے مطابق تمام ضروری اختیارات تفویض کر دیے گئے ہیں تاکہ وہ امن و امان کے قیام اور سیکیورٹی کی معاونت میں اپنا فعال کردار ادا کر سکیں۔

نوٹیفکیشن میں واضح ہدایت کی گئی ہے کہ کسی بھی قسم کے انتشاری و مسلح جتھوں کے حملوں اور پرتشدد سرگرمیوں کا سدباب کرنے کے لیے رینجرز اور پولیس مل کر مناسب و سخت جوابی اقدام کریں۔ حکام نے قانون نافذ کرنے والے اداروں کو مکمل اختیارات دیتے ہوئے ہدایت کی ہے کہ عوام کے جان و مال کے تحفظ اور سیکیورٹی خطرات سے نمٹنے کے لیے تمام ممکنہ اور ضروری اقدامات برائے امن نافذ کیے جائیں۔