ترکمانستان نے ایرانی طیارے کو فضائی حدود میں داخل ہونے سے روک دیا

خطے میں جاری کشیدہ صورتحال کے دوران وسطی ایشیائی ملک ترکمانستان نے ایک ایرانی طیارے کو اپنی فضائی حدود میں داخل ہونے سے روک دیا ہے، جس کے بعد اجازت نہ ملنے پر مذکورہ پرواز کو مجبورا واپس تہران لوٹنا پڑا۔ ایرانی سول ایوی ایشن آرگنائزیشن کے ترجمان مجید اخوان نے واقعے کی تصدیق کرتے ہوئے بتایا کہ اس ایرانی طیارے کو ہنگامی طور پر تہران کے امام خمینی انٹرنیشنل ایئرپورٹ پر اتار لیا گیا ہے۔

دوسری جانب، ایرانی میڈیا کے مطابق متحدہ عرب امارات جانے والی تمام ایرانی ایئرلائنز کی پروازیں بھی معطل یا منسوخ کر دی گئی ہیں۔ ایرانی حکام کا کہنا ہے کہ یو اے ای کی جانب سے پروازوں کی اس اچانک معطلی سے متعلق ایران کو تاحال کوئی باضابطہ پیشگی اطلاع نہیں دی گئی، تاہم اماراتی ہوائی اڈوں کے ڈپارچر بورڈز سے ایرانی پروازوں کا شیڈول ہٹا دیا گیا ہے جس سے فضائی سفر کے بحران میں مزید اضافہ ہو گیا ہے۔