مالدیپ کی عوامی مجلس کے سپیکر کا جی ایچ کیو کا دورہ، فیلڈ مارشل عاصم منیر سے ملاقات

پاک فوج کے شعبہ تعلقاتِ عامہ (ISPR) کے مطابق مالدیپ کی عوامی مجلس (پارلیمنٹ) کے اسپیکر عبدالرحیم عبداللہ نے جنرل ہیڈ کوارٹرز (GHQ) کا دورہ کیا، جہاں انہوں نے فیلڈ مارشل سید عاصم منیر سے ملاقات کی۔

آئی ایس پی آر کے جاری کردہ بیان کے مطابق اس ملاقات کے دوران باہمی دلچسپی کے امور، علاقائی سلامتی کی صورتحال اور دوطرفہ دفاعی و پارلیمانی تعاون پر تفصیلی تبادلہ خیال کیا گیا۔ فیلڈ مارشل سید عاصم منیر نے اس موقع پر مالدیپ کے ساتھ برادرانہ تعلقات کو خصوصی اہمیت دینے کا اعادہ کرتے ہوئے دونوں ممالک کے باہمی مفاد پر مبنی تعلقات کو مزید مستحکم کرنے کے عزم کا اظہار کیا۔

مالدیپ کے اسپیکر عبدالرحیم عبداللہ نے علاقائی امن و استحکام کے فروغ اور خطے میں پائیداری کے لیے پاکستان کے مخلصانہ اور تعمیری کردار کی بھرپور تعریف کی۔ ملاقات کے اختتام پر دونوں رہنماؤں نے دوطرفہ روابط کو مزید گہرا کرنے اور باہمی دلچسپی کے تمام شعبوں میں تعاون کو نئی بلندیوں تک لے جانے کی خواہش کا اظہار کیا۔