سیاسی لوگوں پر نٹ لانچر استعمال نہیں ہوتے، حکومت اپنی انا ختم کر کے بات سنے: بیرسٹر گوہر

پاکستان تحریک انصاف (پی ٹی آئی) کے چیئرمین بیرسٹر گوہر نے پارلیمنٹ ہاؤس میں میڈیا سے گفتگو کرتے ہوئے حکومت کو انا کی سیاست ترک کرنے اور اپوزیشن سے باضابطہ مذاکرات کا راستہ اختیار کرنے کا مشورہ دیا ہے۔ انہوں نے کہا کہ تحریک انصاف کا احتجاجی اور لانگ مارچ کا پروگرام پہلے سے طے شدہ ہے جس میں کوئی تبدیلی نہیں کی گئی، کیونکہ بارہا مطالبے کے باوجود پارٹی کو انصاف فراہم نہیں کیا گیا۔ بیرسٹر گوہر نے متنبہ کیا کہ پرامن سیاسی کارکنوں کے خلاف ’نٹ لانچرز‘ اور پرتشدد اقدامات کا استعمال بند کیا جائے اور حکومت ایسا تاثر دینا چھوڑے کہ پی ٹی آئی اداروں یا اسلام آباد پر حملہ کرنے جا رہی ہے، کیونکہ سیاسی جماعتوں کو میدان سے باہر کرنے کے نتائج ہمیشہ خطرناک نکلتے ہیں۔

بیرسٹر گوہر نے خیبر پختونخوا کی سیاسی صورتِ حال پر بات کرتے ہوئے کہا کہ صوبے میں غیر اعلانیہ گورنر راج جیسی کیفیت قائم کر دی گئی ہے، جبکہ آئین کے تحت صوبائی خود مختاری، عوام کے مینڈیٹ اور اراکینِ اسمبلی کا احترام ہونا چاہیے۔ انہوں نے واضح کیا کہ بانی پی ٹی آئی عمران خان کو وزیراعلیٰ سہیل آفریدی پر مکمل اعتماد حاصل ہے اور پوری پارٹی ان کے ساتھ کھڑی ہے۔ انہوں نے حکومت سے مطالبہ کیا کہ انتقامی سیاست اور ایک دوسرے کا گریبان پکڑنے کا سلسلہ فوری طور پر ختم کیا جائے تاکہ ملک میں سیاسی استحکام اور سکون قائم ہو سکے۔