وزیر خزانہ کی اہم ملاقاتیں، ڈیجیٹائزیشن، پی آئی اے اور ریکوڈک پر مشاورت

نیویارک میں وفاقی وزیرِ خزانہ محمد اورنگزیب کی اہم عالمی اور امریکی مالیاتی حکام کے ساتھ ملاقاتیں ہوئی ہیں، جن میں پاکستان کی معاشی ڈیجیٹائزیشن، ایوی ایشن سیکٹر کی بحالی، کان کنی اور بین الاقوامی اقتصادی تعاون کے فریم ورک پر تفصیلی گفتگو کی گئی۔ وزیرِ خزانہ نے زور دیتے ہوئے کہا کہ ڈیجیٹائزیشن پاکستان کی پائیدار معاشی ترقی کے لیے ناگزیر ہے، جس کے تحت ڈیجیٹل پبلک انفراسٹرکچر، کیش لیس ادائیگیوں کے فروغ اور فری لانسرز کو اعلیٰ مہارتوں میں منتقل کرنے پر تیزی سے کام جاری ہے۔ انہوں نے انکشاف کیا کہ پاکستان میں ورچوئل اثاثہ جات کی قانونی نگرانی، کم لاگت ترسیلاتِ زر، اور سرکاری قرضوں و رئیل اسٹیٹ کی ممکنہ ٹوکنائزیشن (Tokenization) کے امکانات پر بھی غور کیا جا رہا ہے۔

دورے کے دوران وزیرِ خزانہ نے امریکی ایکسپورٹ امپورٹ بینک (EXIM Bank) کے چیئرمین جان جوانووچ سے خصوصی ملاقات کی، جس میں پاکستان انٹرنیشنل ایئرلائنز (PIA) کے لیے نئَ بوئنگ 787 ڈریم لائنر طیاروں اور انجنوں کی خریداری، پری ڈیلیوری ادائیگیوں کے لیے امریکی مالیاتی پیکیج، اور گراؤنڈ شدہ بوئنگ 777 طیاروں کے اسپیئر پارٹس کی فراہمی پر بات چیت ہوئی۔ اس کے علاوہ، ملاقات میں ریکو ڈک (Reko Diq) جیسے اہم کان کنی کے منصوبے اور تیل کی ریفائنریوں کی اپ گریڈیشن کے لیے امریکی مالی امداد کے حصول پر بھی تبادلہ خیال کیا گیا۔ وزیرِ خزانہ کا کہنا تھا کہ ریکو ڈک منصوبہ ملکی برآمدات کا مستقبل ہے اور اس میں تاخیر کے مالیاتی نقصان کو کسی صورت نظرانداز نہیں کیا جا سکتا۔