عباس عراقچی کی امریکی حکام سے ملاقات پر ایرانی رکن پارلیمنٹ نے سوال اٹھا دیا

ایرانی پارلیمنٹ (مجلس شورائے اسلامی) کے قومی سلامتی اور خارجہ پالیسی کمیشن کے رکن ابراہیم رضائی نے وزیر خارجہ عباس عراقچی کی امریکی حکام کے ساتھ حالیہ ملاقات پر شدید تحفظات کا اظہار کرتے ہوئے سخت ردعمل دیا ہے۔ انہوں نے اس ملاقات کو ایران کے اصولی اور مضبوط مؤقف کو کمزور کرنے کے مترادف قرار دیا اور وزارتِ خارجہ کے اختیارات پر تنقید کرتے ہوئے یاد دلایا کہ وزارتِ خارجہ بنیادی طور پر پالیسی ساز ادارہ نہیں بلکہ طے شدہ پالیسیوں پر عمل درآمد کرنے کا ذمہ دار ہے۔

ابراہیم رضائی نے وزیر خارجہ سے مطالبہ کیا کہ وہ قوم کو واضح کریں کہ انہوں نے کس آئینی اور قانونی اختیار کے تحت امریکی نمائندے سے ملاقات کی۔ انہوں نے مؤقف اختیار کیا کہ اگرچہ تہران کی شرائط واشنگٹن تک پہنچائی جا چکی ہیں، تاہم ان شرائط کی آڑ میں اس قسم کی ملاقاتوں کا جواز تراشنا سفارتی کمزوری کی علامت ہے۔ انہوں نے مزید تنبیہ کی کہ قومی سلامتی اور خارجہ پالیسی انتہائی حساس معاملات ہیں جہاں کسی قسم کی لاپرواہی کی گنجائش نہیں، اور ایرانی پارلیمنٹ ملک کے مصلحتوں اور قومی مفادات کا ہر قیمت پر تحفظ کرے گی۔