وزیراعظم کی آئی ایم ایف منیجنگ ڈائریکٹر سے ملاقات، مسلسل تعاون پر شکریہ ادا کیا

وزیراعظم پاکستان شہباز شریف کی واشنگٹن میں بین الاقوامی مالیاتی فنڈ (آئی ایم ایف) کی ایم ڈی کرسٹالینا جارجیوا سے اہم ملاقات ہوئی ہے۔ دورانِ گفتگو وزیراعظم نے پاکستان کے معاشی استحکام اور اصلاحات کے سفر میں آئی ایم ایف کے مسلسل تعاون پر کرسٹالینا جارجیوا کا شکریہ ادا کیا اور دونوں فریقین کے درمیان تعمیری شراکت داری کو فروغ دینے میں ان کے کردار کی تعریف کی۔

شہباز شریف نے حکومتی سطح پر اصلاحاتی ایجنڈے پر مکمل اور بلا تعطل عملدرآمد کے عزم کا اعادہ کرتے ہوئے کہا کہ علاقائی تنازعات، عالمی سطح پر مہنگائی کے دباؤ اور دیگر خارجی چیلنجز کے باوجود پاکستان کی معیشت اب پائیدار بحالی کی جانب گامزن ہے۔ انہوں نے کہا کہ سخت مالیاتی نظم و ضبط اور بیرونی مالیاتی ذخائر میں نمایاں بہتری ممکن ہوئی ہے۔ ملاقات کے دوران آئندہ کے آئی ایم ایف پروگرام کے جائزوں، اقتصادی لچک کو تقویت دینے اور ملک میں بنیادی معاشی اصلاحات کے پائیدار نتائج پر تفصیلی گفتگو کی گئی۔