افغان طالبان رجیم کے 8 ڈرونز پاکستانی حدود میں داخل، تمام مار گرائے

آج صبح افغان طالبان حکومت کی جانب سے 8 ڈرونز نے پاکستانی فضائی حدود کی خلاف ورزی کرتے ہوئے داخل ہونے کی کوشش کی، جسے افواجِ پاکستان کے فعال اور جدید ترین ایئر ڈیفنس سسٹم نے بروقت اور مستعد کارروائی کرتے ہوئے ناکام بنا دیا اور تمام ڈرونز کو فضامیں ہی مار گرایا۔ سیکیورٹی ذرائع کے مطابق 4 ڈرونز طورخم بارڈر سے ملحقہ سرحدی علاقوں جبکہ باقی 4 ڈرونز کو کوہاٹ سے متصل پہاڑی سلسلے میں تباہ کر کے گرایا گیا۔

سیکیورٹی ذرائع کا کہنا ہے کہ افواجِ پاکستان اور پاک فضائیہ نے عوامی مقامات اور سیکیورٹی تنصیبات کو نشانہ بنانے کی اس مذموم کوشش کو انتہائی پیشہ ورانہ انداز میں ناکام بنایا۔ ذرائع کے مطابق یہ دراندازی افغان طالبان حکومت کی جانب سے دہشت گردوں کی براہِ راست معاونت، سرپرستی اور پاکستان دشمن اقدامات کا ایک اور واضح ثبوت ہے۔ واضح رہے کہ گزشتہ رات بھی کرم سیکٹر میں افغان طالبان کی جانب سے کی جانے والی بلااشتعال فائرنگ کے موثر جواب میں افواجِ پاکستان نے ان کے متعدد مورچوں اور ٹھکانوں کو تباہ کر دیا تھا۔ سیکیورٹی ذرائع نے اعادہ کیا ہے کہ افواجِ پاکستان وطنِ عزیز کے دفاع اور عوام کی سلامتی کے لیے ہر لمحہ ہمہ وقت تیار اور الرٹ ہیں۔