آبنائے ہرمز میں جہازوں کیلئے نئی پابندی، خلاف ورزی پر بھاری جرمانہ مقرر

ایران نے آبنائے ہرمز سے اپنے طے کردہ قواعد اور اجازت ناموں کی خلاف ورزی کرتے ہوئے گزرنے والے تجارتی بحری جہازوں کے خلاف سخت ترین قانونی کارروائی کا باقاعدہ اعلان کر دیا ہے۔ ایرانی خبر رساں ادارے ‘فارس’ کے مطابق، مقررہ ضوابط پر پورا نہ اترنے والے جہازوں پر ان کے لادے گئے سامان کی مجموعی مالیت کا 20 فیصد بھاری جرمانہ عائد کیا جائے گا۔

ایرانی پارلیمنٹ کی قومی سلامتی اور خارجہ پالیسی کمیٹی کے ترجمان حسن قشقاوی نے بتایا کہ کمیٹی نے آبنائے ہرمز سے متعلق مجوزہ نئے قانون کی اہم شقوں کی منظوری دے دی ہے۔ ان شقوں کے تحت خلاف ورزی کے مرتکب تجارتی جہازوں سے نہ صرف جرمانہ وصول کیا جائے گا بلکہ جرمانے کی مکمل ادائیگی تک انہیں عارضی طور پر ایرانی تحویل میں رکھنے کی قانونی اجازت بھی ہوگی۔ ترجمان کے مطابق نئی شقوں کا مقصد اس اہم ترین بحری گزرگاہ پر ایران کے طے شدہ قوانین پر سو فیصد عملدرآمد کو یقینی بنانا ہے۔

یہ سخت اقدام ایک ایسے وقت میں سامنے آیا ہے جب خطے میں بڑھتی ہوئی شدید کشیدگی کے باعث آبنائے ہرمز میں عالمی تجارتی جہازوں کی آمدورفت پہلے ہی انتہائی نچلی سطح پر آ چکی ہے۔ عالمی خبر رساں ادارے ‘رائٹرز’ کے مطابق، 21 ستمبر کو محض دو بڑے تجارتی جہاز ہی اس راستے سے گزرے، جبکہ حالیہ تنازع کی شروعات سے قبل روزانہ اوسطاً 125 بڑے تجارتی جہاز اس گزرگاہ کو استعمال کرتے تھے۔ واضح رہے کہ خلیج فارس سے عالمی منڈیوں کو تیل اور انرجی مصنوعات کی فراہمی کے لیے آبنائے ہرمز دنیا کا حساس ترین سمندری راستہ سمجھا جاتا ہے۔