ایران نے اپنا مؤقف اور شرائط امریکا تک پہنچا دیں: اسماعیل بقائی

ایرانی وزارتِ خارجہ کے ترجمان اسماعیل بقائی نے نیویارک میں امریکی فریق کے ساتھ ہونے والے حالیہ رابطوں پر وضاحت جاری کرتے ہوئے بتایا ہے کہ یہ بات چیت براہِ راست نہیں بلکہ قطری ثالث کے ذریعے انجام پائی ہے۔ میڈیا سے گفتگو کرتے ہوئے انہوں نے کہا کہ تہران نے خطے میں کشیدگی کے خاتمے اور سٹریٹجک تنازعات کے حل کے لیے اپنے بنیادی مواقف اور شرائط قطری حکام کے توسط سے واشنگٹن تک پہنچا دی ہیں۔ ایرانی شرائط میں تمام عسکری محاذوں پر جنگ کا فوری خاتمہ، امریکی فوجی کارروائیوں کا تدارک، ایران کی بحری ناکہ بندی کا اختتام، معاشی جنگ کا خاتمہ اور دنیا بھر میں منجمد ایرانی اثاثوں کی فوری بحالی شامل ہیں۔

ترجمان نے مزید بتایا کہ اقوامِ متحدہ کے اجلاس میں امریکی صدر ڈونلڈ ٹرمپ کی تقریر کے دوران ایرانی وفد نے احتجاجاً واک آؤٹ کیا۔ اس موقع پر ایرانی وزیرِ خارجہ عباس عراقچی نے متعدد عالمی رہنماؤں کے ساتھ دوطرفہ ملاقاتیں کیں، تاہم ایرانی وفد نے امریکا سے کسی قسم کے خصوصی حفاظتی اقدامات کی درخواست نہیں کی۔ یاد رہے کہ اس سے قبل ذرائع ابلاغ میں ایرانی وزیرِ خارجہ عباس عراقچی کی ٹرمپ کے خصوصی مندوب اسٹیو وٹکوف اور امریکی سینئر مستشار جیرڈ کُشنر سے نیویارک میں غیر رسمی ملاقاتوں کی خبریں بھی سامنے آئی تھیں۔